Pedaqoji Universitetin ən böyük fakültələrindən biri sayılan İbtidai təhsil fakültəsi 1958/59-cu tədris ilində İbtidai təhsil pedaqogikası və metodikası  adı ilə fəaliyyətə başlamışdır. 1960/61-ci tədris ilində fakültənin nəzdndə məktəbəqədər tərbiyə şöbəsi yaradılmış, Azərbaycan və rus qruplarına qəbul həyata keçirilmişdir. Az sonra Pedaqoji fakültə adlandırılmışdır. Hazırda İbtidai təhsil fakültəsi adlanır. 

Fakültənin inkişafında akademik Mehdi Mehdizadə, prof.Mərdan Muradxanov, prof. Şövqi Ağayev, prof. Ağamməd Abdullayev, prof. Nəmidə Abbasova, prof. Xəlil Fətəliyev, prof.Zahid Xəlilov, prof.Fərrux Rüstəmovun, dos.İsfəndiyar Vəlixanlı, dos. Əfşan Qədimbəyova, dos.Musa Həsənov, dos.Əyyub Tağıyev və dos.Məcid İsmixanovun mühüm xidmətləri olmuşdur. 2010-cu ildə Təhsil Naziliyinin təşəbbüsü ilə Pedaqoji fakültənin 50 illik yubileyi keçirilmişdir. Fakültənin təşkilatçılığı ilə prof.Mərdan Muradxanovun, dos.İsfəndiyar Vəlixanlının 100 illik yubileyləri keçirilmişdir. 2009-cu ildə fakültənin nəzdində “Təhsilin əsasları” adlı ixtisaslaşdırılmış auditoriya yaradılmış, prof.F.Rüstəmovun təşəbbüsü ilə "Pedaqoji təhsilin problemləri" elmi-tədqiqat laboratoriyası təşkil edilmişdir.  

2015-ci ilin oktyabr ayında Pedaqoji fakültənin musiqi müəllimliyi və Mühəndis-pedaqoji və bədii qrafika fakültəsinin təsviri incəsənət müəllimliyi  ixtisasları birləşdirilərək müstəqil Musiqi və təsviri sənət fakültəsi yaradılmışdır.  

2007-ci ildən fakültəyə pedaqoji elmlər doktoru, professor, Əməkdar elm xadimi Fərrux Rüstəmov rəhbərlik edir.

Fakültədə Elmi Şura (sədr prof.Fərrux Rüstəmov), Tələbələ Elmi Cəmiyyəti (sədr dos.Ümhani Məmmədova), Həmkar İttifaqı Komitəsi  (dos.Tamilla Vahabova), Tələbə Gənclər Təşkilatı (Gülpəri Məmmədəli), Tələbə Həmkarlar Təşkilatı  (Şəhla Qarazadə) fəaliyyət göstərir. 

2011-2022-ci illərdə fakültənin əməkdaşlarından 9 nəfər fəlsəfə doktoru dissertasiyası müdafiə etmiş, 2 nəfərin elmlər doktorluğu, 2 nəfərin fəlsəfə doktorluğu dissertasiyası müdafiəyə təqdim olunmuşdur. 

Fakültənin əməkdaşlarından prof.Fərrux Rüstəmov “Tərəqqi” medalına, Əməkdar elm xadimi fəxri adına, dos.Tamilla Vahabova, dos.Rasim Şükürov, b/m.Zaman Məmmədov Əməkdar müəllim fəxri adlarına  layiq görülmüşdür. 2021-ci ildə prof.Fərrux Rüstəmov 3-cü dərəcəli “Əmək” ordeni ilə təltif olunub.