19.03.2025 tarixində ADPU-nun İbtidai Təhsil fakültəsində Novruz bayramı ilə əlaqədar bədii-əyləncəli tədbir təşkil olunub.Tədbir Azərbaycan Respublikasının Dövlət Himni ilə başlamışdır.

Vətən müharibəsində şəhid olan qəhrəmanlarımızın xatirəsi bir dəqiqəlik sükutla yad edilmişdir
Tədbirdə fakültə dekanı prof. Qızxanım Qəhrəmanova, İbtidai təhsilin pedaqogikası kafedrasının müdiri p.e.d, prof., Fərrux Rüstəmov, Riyaziyyatın ibtidai kursunun tədrisi texnologiyası kafedrasının müdiri prof., Əbülfət Pələngov, Musiqi və onun tədrisi texnologiyası kafedrasının müdiri, dosent Laçın Həsənova və digər professor-müəllim heyəti, qonaqlar və tələbələr iştirak ediblər.
Fakültə dekanı Qızxanım Qəhrəmanova tədbir iştirakçılarını Novruz bayramı münasibətilə təbrik edərək onlara cansağlığı, xoş günlər və gələcək fəaliyyətlərində uğurlar arzulayıb. O qeyd edib ki, biz xoşbəxtik ki, bu gün dövlət başçımız, Müzəffər Ali Baş Komandan cənab İlham Əliyevin başçılığı ilə işğaldan azad edilmiş ərazilərimizdə bayram tonqallarını alovlandırmasına şahidlik edirik. Bu bayram tonqalları həm də bizim ərazi bütövlüyümüzü, suverenliyimizi simvolizə edir.
Bayram şənliyi fakültənin fəal tələbələrinin yaradıcılıq bölməsinin hazırladığı konsert proqramı ilə davam edib. Novruza aid qədim adət-ənənələrimizin əks olunduğu səhnəciklər, tələbələrin iştirakı ilə nümayiş etdirilən qədim xalq-mərasim oyunları və müxtəlif rəqs nömrələri iştirakçılarda yüksək ovqat yaradıb.
Tədbir bayram tonqalının alovlandırılması və bədii-musiqili hissə ilə başa çatıb.