Qazaxıstan Universitetlərinin Təhsil Sərgisində İbtidai Təhsil Fakültəsinin Tələbələri Fəal İştirak edib

4-5 mart 2025-ci il tarixlərində keçirilən Qazaxıstan Universitetlərinin Təhsil Sərgisində Azərbaycan Dövlət Pedaqoji Universitetinin İbtidai Təhsil Fakültəsinin tələbələri də fəal iştirak ediblər. Tədbirdə fakültənin beynəlxalq əlaqələr üzrə məsul şəxsi Elnur Əsgərlinin rəhbərliyi ilə ictimai fəal tələbələr müxtəlif universitetlərin nümayəndələri ilə görüşlər keçirib, təhsil imkanları ilə tanış olub və beynəlxalq əməkdaşlıq perspektivlərini müzakirə ediblər.

Sərgi yüksək səviyyədə təşkil olunmuş və iki qardaş ölkə arasında təhsil sahəsində əməkdaşlığın gücləndirilməsi məqsədi daşımışdır. Tədbirdə Azərbaycan Respublikasının elm və təhsil naziri Emin Əmrullayev və Qazaxıstanın elm və ali təhsil naziri Sayasat Nurbek iştirak ediblər.

Tələbələr sərgi çərçivəsində müxtəlif universitetlərin təqdimatlarında iştirak edərək Qazaxıstanın ali təhsil sistemi, təqaüd proqramları və akademik mübadilə imkanları haqqında geniş məlumat əldə ediblər. Tədbir, tələbələrin beynəlxalq təhsil imkanlarını öyrənmələri və gələcək akademik karyeralarını daha uğurla planlaşdırmaları baxımından böyük əhəmiyyət kəsb edib.